Kotun koli ta sa Firai Ministan Pakistan ya yi murabus

Firai Minista Pakistan Nawaz Sharif ya yi murabus bayan kotun kolin kasar ta ce bai cancanta ya ci gaba da rike mukaminsa ba.

Kotun ta yanke hukuncin ne bayan wani bincike da aka yi kan dukiyar iyalinsa sakamakon abin kunyar nan na Panama Papers ya gano cewa yana da dukiya a kasashen da ke zille wa biyan haraji.

Mr Sharif ya sha musanta aikata ba daidai ba a kan wannan batu.

Bakin alkalai biyar din da suka yanke hukunci a kotun Islamabad, wacce ta cika makil da jama’a, ya zo daya kan hukuncin.

“Nawaz Sharif daga mukamin Firai Minista sakamakon hukuncin kotun,” in ji wata sanarwa da kakakinsa ya fitar.

An yi ta zaman dar-dar a babban birnin kasar kafin hukuncin kotun, inda aka sanya dubban dakarun soji da ‘yan sanda cikin shirin ko-ta-kwana.

Daya daga cikin alkalan, Ejaz Afzal Khan, ya ce Mr Sharif “ba shi da gaskiyar da zai ci gaba da zama dan majalisar dokoki”.

Tun da fari dai, Ministan cikin gidan Pakistan Chaudhry Nisar Ali Khan ya bai wa Mr Sharif shawarar amincewa da hukuncin kotun.

Kotun ta ba da shawarar gudanar da bincike kan mutane da dama game da hannu a cin hanci, cikin su har da ‘yar Mr Sharif, Maryam da mijinta Safdar, da ministan kudi Ishaq Dar.

Asalin Labari:

BBC Hausa


Karanta:  Wani mutum ya kashe matarsa saboda ta yi masa dariya

Leave a Reply

Your email address will not be published.