Osinbajo zai rantsar da sabbin ministoci 2 ranar Laraba

Mukaddashin Shugaban Nigeria Yemi Osinbajo zai rantsar da sabbin ministocin nan biyu da suka kwashe fiye da wata biyu suna dakon shan rantsuwar da safiyar Larabar nan.

A wani sakon a shafinsa na twitter, Mataimakinsa kan Watsa Labarai Laolu Akande ya ce za a rantsar da su ne a farkon taron majalisar ministocin kasar na mako-mako da ake yi kowace Laraba.

Sabbin ministocin da za a rantsar su ne Stephen Ocheni daga jihar Kogi da kuma Sulaiman Hassan daga jihar Gombe – wadanda majalisar dattawa ta tantance tun a farkon watan Mayu lokacin da kasar ke cikin wani rudani game da halin da Shugaba Muhammadu Buhari ke ciki.

Mr. Ocheni dai zai maye gurbin tsohon Ministan Kwadago marigayi James Ocholi wanda ya rasu cikin wani hadarin mota a bara; yayin da Sulaiman Hassan zai maye gurbin tsohuwar ministar kare muhalli Amina Muhammad wadda aka nada mataimakiyar babban sakataren Majalisar Dinkin Duniya.

Asalin Labari:

BBC Hausa

255total visits,1visits today


Karanta:  Buhari Ya Bada Damar Gina Layin-Dogo Daga Kano Zuwa Daura Kasarsa Ta Haihuwa

Leave a Reply

Your email address will not be published.