Cututukan huhu sun hallaka mutane miliyan 3 da rabi

Wani Binciken masana kiwon lafiya ya ce wasu kananan cututuka da ke kama huhu sun hallaka mutane sama da miliyan uku da rabi a shekarar 2015.

Rahotan binciken da aka wallafa a Mujallar kula da lafiya ta ce mutane kusan miliyan 3 da dubu dari 2 suka mutu sakamakon cutar da ke da nasaba da shan taba ko kuma gurbacewar muhalli, yayin da dubu dari 4 kuma suka mutu sakamakon cutar asthma.

Farfesa Theo Vos na Jami’ar Washington ya jagoranci wannan bincike wanda ya yi nazarin bayanan da aka tattara daga kasashe 188 na duniya wanda ya shafi wadanda suka kamu da cututukan da kuma wadanda suka mutu tsakanin shekarar 1990 zuwa shekarar 2015.

Kasashen da suka fi kamuwa da cutar da ke da nasaba da shan taba sun hada da Papua New Guinea da India da Lesotho da kuma Nepal, yayin da aka fi samun cutar asthma a Afghanistan da Jamhuriyar Afirka ta Tsakiya da Fiji da Kiribati da Lesotho da Papua New Guinea da kuma Swaziland.

Hukumar lafiya ta Majalisar Dinkin Duniya ta ce cutar da ke da nasaba da shan taba da kuma gurbacewar muhalli ita ce ta 4 wajen kisa a duniya a shekarar 2015, bayan cutar zuciya da ta kashe mutane miliyan 9 da shanyewar jiki da ta kashe mutane miliyan 6 sai kuma cutar da ke shafar numfashi da ta kashe miliyan 3 da dubu dari 2.

Asalin Labari:

RFI Hausa

837total visits,1visits today


Karanta:  'Miliyoyi ne ke fama da cutar amosanin jini a Nigeria'

Leave a Reply

Your email address will not be published.

This site uses Akismet to reduce spam. Learn how your comment data is processed.